131 Den bo Bario a yega 1.126 adres den 10 bario

ORANJESTAD – Pa di 12 aña consecutivo, 131 a organisa su proyecto “131 Den bo Bario”, cu meta di acerca su servicionan na mayornan y informa nan con 131 por sostene mucha y hoben na Aruba.

Durante e bishitanan, personal di 131 ta splica pakico mucha y hoben por tuma contacto, ki ora e servicio ta disponibel y cu tur contacto ta anonimo y gratis. Tambe nan ta combersa cu mayornan tocante desaroyo di mucha y hoben y e retonan cu famianan ta enfrenta den educacion di nan yiunan.

E aña aki, 131 a bishita 10 bario den diferente districto, entre otro Bushiri, Madiki, Seroe Patrishi, Tarabana, Cura Cabai Zuid, Village y De Vuyst. Na total, personal a yega 1.126 adres, unda nan a conversa cu habitantenan y laga informacion tocante e servicio.

Segun 131, reaccion den e barionan tabata masha positivo, cu mayornan y adultonan expresando aprecio pa e sosten cu organisacion ta brinda na mucha, hoben y famia.