Wever: Seleccion transparente pa boutique restaurant na ex-Esso Lago

ORANJESTAD – Minister di Finansa, Asuntonan Economico y Sector Primario, Geoffrey Wever, a duna mas detaye tocante e procedimiento di seleccion pa transforma e anterior sitio di Esso Lago na Maria Christinastraat den un boutique restaurant, como parti di revitalisacion di centro di Oranjestad.

Segun Wever, tur interesado cu cumpli cu e condicionnan por participa. Un comision special cu representante di entre otro ATA, DIP, DOW, ATIA y varios ministerio lo evalua e propuestanan independientemente mediante un sistema di maximo 100 punto.

Evaluacion lo considera experiencia den horeca, concepto architectonico, sostenibilidad, balor agrega di e concepto culinario y capacidad financiero. Cada participante tambe mester presenta un estudio di factibilidad. Ademas, lo tin un integridadstoets, incluyendo identificacion di UBO, screening di directivanan y control di origen di e recursonan financiero.

Interesadonan tin te diabierna 18 di september 2026 pa entrega nan propuesta. Despues di evaluacion, e comision lo presenta su conseho na e ministernan, cu despues lo tuma e decision final conforme cu e procedimiento legal.

Wever a enfatisa cu Gobierno kier cu revitalisacion di Oranjestad bay pareu cu transparencia, igualdad y inversion responsabel.