DVG ta alerta pa calor fuerte: indice por yega 40°C

ORANJESTAD – Directie Volksgezondheid Aruba (DVG) ta pidi comunidad pa tuma precaucion durante e condicionnan di calor fuerte. Segun Departamento Meteorologico Aruba, temperatura maximo por yega 34°C, mientras cu indice di calor por varia entre 35°C y 40°C, particularmente rond di oranan di merdia.

Indice di calor ta indica con cayente temperatura realmente ta sinti pa curpa, teniendo cuenta cu humedad. Ora humedad ta halto, sodo no ta evapora facilmente y curpa tin mas dificultad pa fria su mes. P'esey, un temperatura di 31°C por sinti manera 37°C of 38°C.

DVG ta alerta cu calor extremo por causa deshidratacion y ansha pa calor, especialmente cerca adulto mayor, baby y mucha chikito, hende muhe na estado, persona cu malesa cronico y hende cu ta traha of haci actividad fisico pafo.

Comunidad ta wordo conseha pa bebe suficiente awa, evita exposicion prolonga na solo, busca sombra of luga fresco, bisti paña liviano y tuma pausa regularmente. Dolor di cabez, mareo, debilidad, nausea y sodamento excesivo por ta señal di problema relaciona cu calor. Confusion of perdida di conocemento ta rekeri atencion medico inmediato.