Dowers: Prome permisonan di Hunto pa Progreso ta caduca na october

ORANJESTAD – E prome permisonan temporal brinda den ultimo fase di Hunto pa Progreso lo cuminsa caduca na final di october. Minister di Husticia Arthur Dowers dialuna a apela na participantennan pa no warda te ultimo momento pa completa nan regularisacion.

E programa a brinda alrededor di 1.500 persona un permiso temporal di maximo un aña, cu intencion pa nan por drenta mercado laboral formal, haya un dunado di trabou y pasa pa e trayecto regular di permiso.

Dowers ta enfatisa cu e permiso solamente ta valido durante e periodo indica. Esnan cu ainda no tin dunado di trabou mester busca uno y regla nan documentacion prome cu e fecha di vencemento.

Gobierno ta tratando tambe di conecta personanan cu ta busca trabou cu empresanan cu tin necesidad di personal. Segun Dowers, peticion di permiso ta wordo evalua conforme cu e reglanan vigente y necesidad di mercado laboral.

Si un participante no logra regularisa su situacion na tempo, recomendacion ta pa sali Aruba boluntariamente pa evita estadia ilegal. Keda sin permiso y posteriormente wordo deporta por trece consecuencia adicional, incluyendo prohibicion temporal pa drenta Aruba.

Dowers a adverti tambe dunadonan di trabou cu emplea persona sin permiso valido cu nan por enfrenta multa y, dependiendo di e caso, posible accion di Ministerio Publico.

Minister a informa ademas cu DIMAS ta mehorando su tempo di procesamento, cu algun peticion nobo actualmente ta wordo trata den aproximadamente tres pa cuatro siman ora documentacion ta completo.