Aruba ta fortalece control financiero cu auditoria independiente

ORANJESTAD – Despues di hopi aña di atraso den entrega di cuentanan anual di Gobierno, Aruba a logra elimina e atraso historico y actualmente ta al dia. Cu entrega di Jaarrekening 2025 algun siman pasa, Gobierno a completa un paso importante pa restablece orden, disciplina y transparencia den maneho financiero di Pais.

Como siguiente paso, Gobierno a firma un convenio cu SOAB pa ehecuta auditoria independiente riba Jaarrekening 2026 y 2027.

Minister di Finansa, Asunto Economico y Sector Primario, Geoffrey Wever, ta indica cu e meta no ta solamente pa elimina e atraso, sino pa crea un sistema financiero cu structuralmente ta funciona cu control, transparencia y responsabilidad.

E convenio cu SOAB tin dos meta principal. Accountantnan profesional lo audita e cuentanan di 2026 y 2027, creando e base pa certificacion di e jaarrekeningnan. Alabes, e periodo lo wordo usa pa fortalece CAD, cu normalmente ta encarga cu auditoria di cuentanan anual di Gobierno.

E intencion ta pa CAD desarrolla su capacidad, conocimiento y organisacion interno durante 2026-2027, pa despues por bolbe asumi responsabilidad pa e auditorianan.

Financiamento ta bini for di Landspakket, bou di “Thema A – Financieel Beheer”, den cooperacion cu Hulanda. Segun Wever, e siguiente reto ta pa mantene e disciplina financiero y evita cu atraso den cuentanan anual bolbe bira un problema.