Gobierno ta compromete pa recluta mas polis

ORANJESTAD – Cuerpo Policial Aruba (KPA) a celebra su 40 aniversario cu un misa na Pro-Catedral San Francisco, den presencia di Gobernador Alfonso Boekhoudt, Minister di Husticia Arthur Dowers, Korpschef Ramon Arnhem, autoridadnan, pensionadonan y delegacionnan policial di diferente pais.

Durante e celebracion, Minister Dowers a destaca cu criminalidad a bira mas compleho durante e ultimo decenianan y cu KPA mester sigui modernisa. Alabes, el a enfatisa cu integridad mester keda un principio fundamental pa conserva confiansa di comunidad den Polis.

Un di e retonan principal actualmente ta falta di personal. Segun Dowers, Aruba tin menos polis cu aproximadamente 10 aña pasa, mientras demanda y complehidad di e trabou a aumenta.

Pa atende cu esaki, Minister Dowers a compromete Gobierno pa recluta mas grupo di polis, cu enfasis riba incorpora y forma hende hoben cu eventualmente por carga mas responsabilidad dentro di KPA.

Delegacionnan policial di Hulanda, Curaçao, Boneiro, Saba, St. Eustatius, Sint Maarten y Suriname tambe a participa den e celebracion. Despues di misa, e cuerponan a participa den un desfile oficial dilanti Bestuurskantoor.

E aniversario ta marca 40 aña di servicio di KPA, pero tambe e reto pa prepara e cuerpo pa futuro cu mas personal, formacion y integridad.