Travel Off Path: Aruba ta encabeza lista di destinacionnan turistico mas sigur

ORANJESTAD – Aruba a ocupa prome luga den un ranking nobo di e 10 destinacionnan turistico mas sigur pa bishita e temporada aki, basa riba experiencia di mas cu 14.000 biahero.

E lista, publica pa Travel Off Path, ta basa riba su Traveler Safety Index, cu ta procesa votonan di biahero cu recientemente a bishita e destinacionnan. Aruba a logra un puntuacion di 97 riba 100, e mas halto di tur destinacion inclui den e ranking.

Segun e publicacion, uno di e puntonan fuerte di Aruba ta cu bishitantenan por explora e isla cu mas libertad, sea huur un auto pa recoré e costa, cana den Oranjestad of bishita diferente bar y beach. E ambiente ta wordo describi como relaha y acogedor.

Ademas, Aruba tin un Level 1 – Exercise Normal Precautions den e clasificacion di seguridad di Departamento di Estado di Merca, e nivel di advertencia mas abou. Travel Off Path ta indica cu experiencia di su biaheronan ta sostene e imagen di Aruba como un destinacion particularmente sigur.

Aruba a termina dilanti di destinacionnan manera Cabo San Lucas, El Salvador, Spaña, Italia, Cayman Islands, Polonia, Anguilla, Cancun y San José del Cabo.