Herdé: Responsabilidad ministerial ta busca solucion concreto pa pueblo

ORANJESTAD - Minister Rene Herdé dialuna a destaca cu asumi responsabilidad ministerial no ta solamente acepta un cargo, sino compromete bo mes pa conoce e realidad di cada departamento, identifica problema y traha riba solucionnan concreto pa pueblo.

Desde inicio, segun Herdé ta bisa den un comunicado, el a enfoca riba dialogo cu departamento y profesionalnan pa comprende e desafionan den practica y forma un team cu combina experiencia y conocemento. E minister ta reconoce cu no tur problema por wordo soluciona inmediatamente, pero ta considera transparencia y ejecucion como parti esencial di bon gobernacion.

“Responsabilidad ta nifica cu bo mester ta dispuesto pa scucha, conoce e problemanan y traha cu transparencia riba solucionnan cu finalmente mester beneficia pueblo,” Herdé a indica.

E ministerio ta sigui enfoca riba modernisacion di servicio, fortalecemento di departamentonan y solucionnan cu por trece resultado concreto pa ciudadano.