Renobacion ex-pompstation ta forma parti di revitalisacion di Oranjestad

ORANJESTAD - Minister di Infrastructura Rene Herdé ta considera renobacion di e ex-pompstation den centro di Oranjestad como parti di un vision mas amplio pa crea e condicionnan necesario pa desaroyo economico y inversion.

Segun Herdé, Gobierno su tarea ta pa pone e fundeshi infrastructural y crea facilidadnan cu ta permiti iniciativa publico y priva avansa. E minister a reconoce cu proyectonan grandi ta exigi tempo, coordinacion y cumplimento di procedimentonan legal, pero a indica cu Gobierno ta trahando pa acelera e procesonan.

E proyecto di ex-pompstation ta forma parti di revitalisacion di centro di Oranjestad, hunto cu restauracion di Fort Zoutman y Willem III Toren, renobacion di Wilhelminastraat y expansion di Parlamento. Meta ta crea un centro mas atractivo y fortalece actividad economico, patrimonio y inversion.