Eman: Mike de Meza lo dicidi pronto si ainda e kier bira minister

ORANJESTAD – Mike de Meza lo tuma algun dia pa pensa si ainda e kier acepta un puesto como minister den gabinete AVP-FUTURO. Prome Minister Mike Eman a confirma esaki diamars anochi, despues cu a bira conoci cu e caso cu durante casi dos aña a afecta e proceso di nombramento di De Meza a yega na su final.

Eman a bisa cu el a papia cu De Meza poco despues di e noticia y cu e parlamentario ta “extremamente alivia” cu e resultado.

Segun Prome Minister, e periodo aki no tabata facil ni pa De Meza ni pa su famia. El a destaca e presion cu e proceso a pone riba nan y a expresa reconocimento pa e manera cu De Meza a enfrenta e situacion.

“No tabata facil pa señor De Meza, y sigur tampoco pa su famia, ora cu su nomber a wordo pone den e situacion aki,” Eman a bisa.

Cu e caso awor tras di lomba, segun Eman, caminda ta habri pa De Meza haci su propio decision tocante su futuro politico.

“Na e momento aki el a informami cu e kier tuma algun dia pa pensa y dicidi si ainda e kier ocupa e puesto di minister,” Prome Minister a declara.

Eman a enfatisa cu De Meza mester haya espacio pa evalua e decision tambe hunto cu su famia, teniendo cuenta cu e periodo dificil cu nan a pasa aden.

Mike de Meza originalmente tabata destina pa bira minister den gabinete AVP-FUTURO, pero su proceso di screening y e asunto fiscal cu a sigui a impidi su nombramento. Segun Eman, si e problema no a surgi, De Meza probablemente ya lo tabata funcionando como minister hunto cu e otro miembronan di gabinete.

Prome Minister a bisa cu Gobierno ta sinti alivio cu e capitulo aki por wordo sera y a laga claro cu, pa su parti, e lo mira cu satisfaccion si De Meza finalmente dicidi acepta un cargo ministerial.

“Semper nos a conoce Mike como un persona prepara, cu tabata preparando su mes pa carga responsabilidad den Gobierno,” Eman a bisa.

Sinembargo, no tin un decision ainda.

Segun Prome Minister, nan lo sigui papia cu De Meza den e proximo dianan mientras e evalua su situacion y determina si, despues di tur loke a pasa, e ainda kier drenta gabinete.

E caso cu durante largo tempo a determina su futuro politico ta tras di lomba. Awo e pregunta principal ta otro: Mike de Meza ainda kier bira minister?