Arends-Reyes(AVP): “Hubentud mester sinti cu nan voz tin balor”

ORANJESTAD – Parlamentario Jennifer Arends-Reyes a participa recientemente na Parlamento Hubenil Camp, unda el a papia cu hobennan tocante trabou di Parlamento, liderato y importancia di participacion civico.

Durante e encuentro, Arends-Reyes a enfatisa cu Parlamento no mester wordo mira como algo leu for di realidad di hubentud. Segun e, hobennan mester sinti cu nan tin un espacio, un voz y oportunidad pa contribui na futuro di Aruba.

E participantenan a haya oportunidad pa haci pregunta, comparti ideanan y conoce mas di cerca con trabou parlamentario ta funciona. Arends-Reyes a indica cu participacion den democracia no ta cuminsa solamente ora un persona yega edad pa vota, sino desde momento cu hobennan interesa nan mes, haci pregunta y envolve den nan comunidad.