Pieters(PPA): Mas di un aña despues, polis ainda sin bodycam

ORANJESTAD – Parlamentario Eduard Pieters di PPA ta cuestiona pakico Gobierno ainda no a implementa bodycam y dashcam pa Cuerpo Policial di Aruba, mas di un aña despues cu Parlamento a aproba unanimemente un mocion pa haci esaki posibel.

Pieters a recorda cu na maart 2025 tur fraccion den Parlamento a sostene e mocion pa pone fondo disponibel pa e tecnologia. Segun Pieters, posteriormente PPA a propone pa usa ingreso extra di e pardonregeling pa financia e proyecto, pero tampoco esaki no a conduci na implementacion.

Pieters a bisa cu durante un bishita na Cuerpo Policial, PPA a mira con e tecnologia ta funciona. Segun e, bodycam y dashcam por proteha tanto polis como ciudadano, documenta intervencionnan y brinda evidencia den caso di incidente, persecucion of accidente.

Gobierno anteriormente a indica cu un proyecto piloto lo cuminsa na juli 2025, pero segun Pieters, polis ainda no a haya e camaranan.

Pa Pieters, e asunto ta bay mas leu cu solamente bodycam. E ta cuestiona pakico decisionnan aproba unanimemente door di Parlamento ta keda sin ehecucion y si Gobierno ta respetando suficientemente e rol di Parlamento.