Otmar Oduber: “Mi TA apela!"

ORANJESTAD — Ex minister Otmar Oduber a anuncia diamars mainta laat,  cu e lo apela e sentencia di dos aña di prizon dicta contra dje. Den un declaracion extenso dirigí na pueblo di Aruba, Oduber a bisa cu, aunke e ta respeta e decision di Corte, e no ta acepta cu e sentencia ta husto y correcto.

“Awe mi ta comparti cu boso un di e momentonan mas dificil di mi bida. Mi a wordo condena na dos aña di prizon. Mi ta respeta e decision di e corte, pero mi no por acept’e,” Oduber a declara.

E ex minister a presenta su caso no solamente como un lucha personal contra su condena, sino tambe como un debate tocante igualdad, autonomia y e posicion di Aruba dentro di Reino Hulandes.

Segun Oduber, tin diferencianan entre e procedimentonan aplicabel na miembronan di Gobierno na Hulanda y esnan cu ta aplica na politiconan na Aruba. E ta cuestiona pakico, dentro di un mesun Reino, no ta existi —segun su interpretacion— e mesun garantia constitucional pa tur minister.

“Mi no ta pidi impunidad, pero si mi ta exigi igualdad. Mi no ta bisa cu un politico mester ta riba e ley. Pero si mi ta bisa cu ningun ciudadano mester ta bou di e ley,” Oduber a expresa.

E a sigui bisa cu no por tin ciudadano of paisnan di prome y segundo categoria dentro di Reino.

“Husticia no por tin dos categoria di ciudadano dentro di un mesun Reino,” e exminister a enfatisa.

Den su declaración, Oduber tambe a haci referencia na e investigacionnan y condenanan contra diferente politiconan di Aruba durante e ultimo añanan. E ta cuestiona cuanto minister of prome minister di Gobierno Nacional Hulandes a wordo condena pa corrupcion durante e ultimo decenionan.

Oduber a aclara cu cu su preguntanan e no ta acusando ningun persona sin prueba, pero cu e ta considera necesario pa por papia abiertamente tocante e diferencianan entre e sistemanan di husticia.

ODUBER TA RECHASA IMAGEN DI CORRUPCION

Tocante e actuacionnan pa cual Corte a conden’e, Oduber a mantene cu e decisionnan cuestiona tabata relaciona cu su trabou como minister y cu su intento pa crea oportunidad di vivienda, empleo y desaroyo pa ciudadanonan di Aruba.

“E tribunalnan a interpreta cierto actuacion di mi gestion como delito. Mi ta respeta e decision, pero mi no ta compartie,” e la bisa.

Oduber a rechasa enfaticamente cu su actuacion tabata motiva pa beneficio personal.

“No pasobra mi tabata corupto. No pasobra mi a horta. No pasobra mi a beneficia mi mes. No pasobra mi a trafica,” e la declara.

Segun Oduber, tin argumento y elemento presenta durante su defensa cu mester wordo examina di nobo. P’esey, e lo continua usa tur recurso legal disponibel pa combati e sentencia.

“Un condena por kita mi libertad, pero e no por kita mi derecho pa defende mi mes,” e a bisa. “Mi lo apela e sentencia aki. Mi lo continua mi defensa via tur e medionan legal cu ta coresponde.”

AUTONOMIA Y RELACION CU HULANDA

Un parti importante di e declaracion ta enfoca riba Oduber su vision tocante autonomia di Aruba. E ex minister a aclara cu su posicion no ta uno contra Hulanda, pueblo Hulandes ni e historia comparti dentro di Reino.

“Mi ta reconoce tur loke nos a construi hunto. Mi ta reconoce loke Hulanda a aporta na Aruba. Pero tambe mi ta exigi pa Hulanda reconoce loke Aruba a aporta,” Oduber a expresa.

Segun e, autonomia no ta limita na tin un bandera, himno, Parlamento of Gobierno, sino ta inclui capacidad real pa Aruba participa y dicidi riba asuntonan fundamental cu ta afecta su futuro.

“Mi no kier pa Aruba ta riba Hulanda. Pero tampoco mi ta acepta cu ta considera Aruba menos cu Hulanda,” e la afirma.

Oduber a termina su declaracion indicando cu e lo enfrenta e proceso di apelacion “cu frenta na laira, cu dignidad y cu fe den Dios.” E la agrega cu, independientemente di e resultado final, e lo sigui defende su derechonan y e principionan den cual e ta kere.

“Nan por condena mi, pero nan no por obliga mi pa renuncia mi conviccionnan,” Oduber a conclui.