Tres homber arma a atraca persona y horta su auto

ORANJESTAD – Polis ta investiga un atraco cu a tuma lugar diabierna poco despues di 1’or di marduga na Hubadastraat, unda tres homber arma lo a atraca un persona su cartera y auto.

Segun informacion preliminar, e victima a conta polis cu, poco despues cu el a yega su cas, tres homber bisti na preto y cu nan cara tapa a acerc'e. Un di nan lo a menaza e homber cu un arma di candela. E sospechosonan a bay cu su cartera, cu placa aden, y su auto.

Segun e victima, e sospechosonan tabata papia Papiamento y Spaño.

Diferente unidad policial a inicia un buskeda den e area. Atraco Team y polis tecnico tambe a presenta na e sitio pa inicia un investigacion.

Un rato despues, un patruya a localisa e auto horta den cercania di Bushiri. E vehiculo a wordo confisca como parti di e investigacion.

Cuerpo Policial Aruba ta pidi cualkier persona cu a mira of sa algo relaciona cu e caso pa yama tipline 11141. Informacion por wordo duna anonimamente. NOTA; Potret crea pa AI pa compaña e articulo.