Trump ta purba limita derecho automatico di ciudadania Mericano atrobe

WASHINGTON – Presidente Donald Trump a firma dos decreto presidencial nobo pa limita e derecho automatico di ciudadania Mericano pa cierto mucha cu nace na Merca y pa combati e fenomeno conoci como “turismo di parto”.

E intento nobo ta sigui despues cu Corte Supremo di Merca a rechasa na juni un medida anterior di Trump cu tabata kier kita ciudadania automatico pa muchanan di, entre otro, migrantenan sin documentonan. Corte Supremo a determina cu e derecho aki ta proteha door di Enmienda 14 di Constitucion Mericano.

E medidanan nobo ta mas limita. Entre otro, Trump kier exclui cierto mucha di personanan cu ta traha na Merca pa gobiernonan stranhero, muchanan unda fraude a wordo usa pa obtene ciudadania y cierto personanan cu Gobierno Mericano clasifica como “enemigo stranhero”.

E di dos decreto ta enfoca riba “turismo di parto”: muhernan cu ta biaha pa Merca principalmente pa duna luz ey, pa nan yiu haya   ciudadania Mericano automaticamente. Gobierno kier haci mas facil pa rechasa visa ora tin indicacion cu esaki ta e motibo principal di biahe.

Segun Migration Policy Institute, estimacion mas halto ta pone e cantidad di caso di turismo di parto na alrededor di 26.000 pa aña, menos cu 1% di mas cu 3,5 miyon parto anual na Merca.

Ta keda duda si e medidanan nobo lo sobrevivi e reto legal. Organisacion di derecho civil ACLU ta sostene cu un decreto presidencial no por cambia e proteccion cu Constitucion ta duna na ciudadania pa nacemento.