Gobierno ta fortalece cuido pa adiccion cu acuerdo cu Brasami

ORANJESTAD – Gobierno di Aruba a firma un acuerdo di cooperacion cu Stichting Brasami di Corsou pa amplia e acceso na tratamiento residencial specialisa pa personanan cu ta enfrenta problemanan serio di adiccion. Segun Minister di Salubridad, Asunto Social, Cuido di Adulto Mayor y Maneho di Adiccion, Melvin Wyatt-Ras, e tipo di cuido aki actualmente no ta disponibel na Aruba.

E acuerdo ta enfoca riba personanan cu mester un trayecto intensivo den e cuadro di cuido obligatorio, den un ambiente terapeutico sigur y structura. No tur persona cu tin problema di adiccion lo califica pa e programa. Un comision special di indicacion lo evalua cada caso, mientras cu e decision final lo wordo tuma pa e hues.

Minister Wyatt-Ras a indica cu e acuerdo ta fortalece e cadena di cuido pa adiccion na Aruba y ta brinda un oportunidad real pa recuperacion y rehabilitacion.

“Cu e acuerdo aki, nos ta fortalece e cadena di cuido pa personanan cu ta enfrenta problemanan serio di adiccion. Si bo yuda un persona cu adiccion, bo ta yuda su famia y henter comunidad,” e minister a declara.

Representantenan di Stichting Brasami a expresa nan aprecio pa e cooperacion cu Gobierno di Aruba y a reafirma nan compromiso pa sigui ofrece tratamiento profesional y cuido di calidad.