Dos siman mas pa decision cay den caso di e-steps

ORANJESTAD – Minister di Husticia, Arthur Dowers, ta spera cu den aproximadamente dos siman lo tin mas claridad den e caso hudicial cu ta trata e operacion di e-stepnan na Aruba. Den un entrevista cu Tito Laclé di Noticiacla, e minister a bisa cu gobierno a entrega e proceso na corte despues cu e companianan cu ta expliota e-stepnan a bringa e decision di gobierno.

Segun Dowers, gobierno a sigui tur paso legal prome cu yega na e fase actual. “Nos a sigui e procedimento. Prome nos a manda carta avisando cu e actividad ta ilegal. Despues nos a duna nan oportunidad pa reacciona, y finalmente nos a anuncia cu lo aplica un dwangsom,” e minister a bisa.

Ora e companianan a dicidi bai corte, nan a argumenta cu nan negocio lo bai bancarota si gobierno sigui cu e medida. Dowers, sinembargo, no ta di acuerdo cu e argumento. “Den mi concepto, nan no por cumpli cu nan obligacionnan pasobra nan ta haciendo un negocio ilegal y ta ricibi entrada ilegal.”

Segun e minister, e companianan a presenta nan ultimo documentonan na Corte y gobierno a ricibi esakinan recientemente. Awor, gobierno ta preparando su reaccion oficial, cu lo wordo entrega den e transcurso di e siman aki. Despues di esey, e minister ta spera cu e huez lo tuma un decision den aproximadamente dos siman.

Dowers a enfatisa cu, aunke e huez por dicidi tocante e aplicacion di e dwangsom, esey no ta cambia e posicion legal di gobierno. “E hecho cu e actividad ta ilegal no kiermen cu e gobierno of polis no por actua. Polis tin autoridad pa actua contra actividad ilegal.”

E minister a bisa cu gobierno lo sigui respeta  e proceso hudicial, pero tambe lo sigui cumpli cu ley, dependiendo di e decision cu e Corte tuma.