Gobierno ta limita multa y costo di incasso pa consumidor riba prestamo

ORANJESTAD – Segun e Boletin Oficial di Aruba (Afkondigingsblad van Aruba), Gobierno di Aruba a publica e reglamento definitivo cu ta pone limite riba varios costo adicional relaciona cu prestamonan pa e consumidor. E medida a drenta na vigor dia 1 di augustus 2026 y ta enfoca riba proteccion di consumidor contra cargo excesivo.

Cu e reglamento nobo, institucionnan financiero no por cobra mas cu 2% pa luna como multa ora un cliente paga laat. Tambe, si un cliente dicidi paga su prestamo mas prome, e costo pa e pago adelanta no por pasa 7,5% di e cantidad cu ta wordo paga.

Un otro cambio importante ta cu gobierno a pone un limite oficial riba costonan di incasso extrahudicial, manera carta di recordatorio, administracion y cobro. E costonan lo mester sigui e tarifa oficial cu ta wordo aplica door di e Corte Comun di Husticia.

E reglamento ta forma parti di e Ley di Credito pa Consumidor y tin como meta pa haci e reglanan mas cla y evita cu consumidornan paga cargo exagera ora nan tuma un prestamo.