TTW:Aruba ta registra crecemento di 10.9% cu turista stayover den prome 6 luna di 2026

ORANJESTAD – Aruba ta sigui consolida su posicion como un di e destinacionnan turistico cu ta crece mas den Caribe. Segun un analisis publica door di Travel and Tour World, e isla a registra un aumento di 10,9% den turista stay-over durante e prome seis luna di 2026, cu un total di 845.501 bishitante.

E informe ta destaca cu e crecimiento no ta bini solamente for di un mercado. Merca ta sigui siendo e fuente principal di turista pa Aruba, cu casi 595 mil bishitante y mas di 70% di tur llegada. Na mes momento, Aruba a logra amplia su alcance internacional cu fuerte crecimiento den Latinoamerica y Europa.

E sobresaliente di tur mercado tabata Argentina, cu a registra un aumento extraordinario di 181,6%, pasando di 25.062 pa 70.587 bishitante. Esaki a convierte Argentina den e di dos mercado internacional mas grandi pa Aruba.

Otro paisnan manera Mexico, Uruguay, Colombia, Peru, Venezuela, Hulanda, Alemania, Italia y Suisa tambe a registra crecimiento, loke, segun e informe, ta confirma cu Aruba ta reduci su dependencia riba un solo mercado y ta fortalece su posicion den turismo internacional.

Travel and Tour World conclui cu e combinacion di mehor conexionnan aereo, estrategia di diversificacion y creciente popularidad di Aruba ta pone e isla den un posicion fuerte pa sigui creciendo durante e resto di 2026.