Dowers: Prevencion ta clave den lucha contra criminalidad

ORANJESTAD – Minister di Husticia Arthur Dowers a expresa su preocupacion continuo tocante e reciente casonan di violencia y asesinato na Aruba, pero a enfatisa cu e autoridadnan ta sigui actua rapidamente pa investiga e casonan y tene e responsableinan accountable. Den un entrevista cu Tito Laclé di Noticiacla, e minister a bisa cu seguridad publico ta keda un prioridad pa gobierno. “Nos preocupacion ta continuo. Casonan manera esakinan tin un impacto grandi riba nos comunidad, y e autoridadnan competente ta actua mesora pa investiga y responsabilisa e autornan,” Dowers a declara.

Segun e minister, durante un investigacion activo ta importante cu gobierno mantene reserva pa no afecta e proceso judicial.

VIOLENCIA DEN AREANAN TURISTICO

Dowers tambe a referi na e hecho cu reciente incidentenan di violencia a tuma lugar den areanan publico y turistico. Segun e mandatario, esey no kiermen cu e problema ta completamente nobo. “Tin momento cu e tipo di acto ta pasa tras di porta cera y tin momento cu e ta pasa den lugarnan publico. Loke nos ta mira awor ta cu un grupo di hobennan no ta hesita mas pa uza violencia y arma di candela.” E minister a bisa cu e autoridadnan ta consciente di e desaroyo aki y ta sigui actua contra e gruponan involvi.

MENSAHE PA COMUNIDAD

Como mensahe pa comunidad, Dowers a pidi pa ciudadanonan participa activamente den prevencion di criminalidad. “Tur hende por contribui. Nos por duna guia, cuido y supervision, pero tambe ta importante pa reporta situacionnan sospechoso na Polis. Nos mester preveni e criminalidad prome cu e situacionnan termina den tragedia.” Segun e minister, un colaboracion estrecho entre comunidad, polis y gobierno ta esencial pa mantene Aruba un pais sigur.