MEP ta pidi mas transparencia den contrato ATA-Ecotech

ORANJESTAD – Lider di Fraccion di MEP, Evelyn Wever-Croes, a presenta cuater les cu, segun e, por yuda fortalece bon gobernacion y transparencia den e asunto rond di e contrato entre ATA y Ecotech. Segun Wever-Croes, e no ta cuestiona e proyecto mes, sino e manera cu e proceso a wordo maneha.

Entre su recomendacionnan ta cu cada minister mester keda den su propio responsabilidad, ATA mester actua solamente den su mandato legal, procedimentonan di destaho publico mester wordo sigui ora ley ta exigi esey, y tur aparencia di conflicto di interes mester wordo evita.

Wever-Croes a bisa cu e puntonan no ta critica pa critica, pero sugerencianan pa mehora gobernacion y preveni duda den futuro. E la agrega cu e ta sperando e informacion solicita na e minister competente prome cu MEP tuma cualkier siguiente paso.