Arthur Dowers no ta exclui candidatura pa proximo Prome Minister

ORANJESTAD – Despues cu Prome Minister Mike Eman a anuncia na luna di juni cu e lo entrega liderazgo di partido AVP durante e Congreso di Liderazgo na september y cu e lo laga e cargo di Prome Minister entrante 1 di januari 2027, speculacion riba su posible sucesor a aumenta den circulonan politico. Un di e nombernan cu ta wordo menciona regularmente ta esun di Minister di Husticia Arthur Dowers. Durante un entrevista cu periodista Tito Laclé di Noticiacla, Dowers a confirma cu e ta wordo acerca frecuentemente tocante e rumor aki, pero a laga cla cu, pa awor, e no ta considera apropiá pa discuti un cargo cu ainda no ta vacante. “Sr. Mike Eman ta Minister Presidente. E ta Minister Presidente te e dia cu e mes dicidi cu e no ta Minister Presidente mas, of ora pueblo disidi esey den eleccion. Ora e momento ey yega, nos por papia di esey,” Dowers a bisa.

ANUNCION DI EMAN 

E anuncio di Eman a marca un momento historico den AVP. Despues di 25 aña como lider di partido y tres periodo como Prome Minister, e la bisa cu e kier duna espacio na un generacion nobo di lidernan, y ta retira na September proximo como lider di e partido berde AVP, mientras cu e ta termina su mandato actual na principio di 2027 como prome minister.

AMBICION

Ora Noticiacla a puntra Dowers directamente si e tin ambicion pa bira Prome Minister of si e lo acepta e responsabilidad si e oportunidad presenta, e minister a contesta cu actualmente e ta enfoca completamente riba su actual cartera. “Mi no tin ambicion pa ningun posicion diferente cu esun cu mi ta ocupa awor. Pero si un dia un porta habri, lo mi considera e situacion.”

EVALUA CADA OPORTUNIDAD

Dowers a splica cu durante henter su carera politico e semper a analiza cada invitacion of oportunidad cu a presenta, y cu su decisionnan semper a wordo basa riba argumentonan y e circunstancianan di e momento. “Tur biaha cu mi a wordo acerca pa un funcion, mi a evalua e situacion y despues a tuma un decision. Pero pa awor ta prematuro pa papia di un posicion cu no ta vacante” e mandatario a sigui bisa. 

ENFOCA RIBA E TRABOU ACTUAL

Aunke e rumor ta sigui circula, Dowers a bisa cu su prioridad ta sigui cumpli cu su responsabilidad como Minister di Husticia. “Mi ta compronde cu hopi hende ta papia di esey, pero pa e momento aki , e no ta e discusion principal. Nos mester sigui enfoca riba haci nos trabou di e mihor manera posible,” e minister a conclui.