Glen Andrew ta cumpli soño di su mayornan como capitan

ORANJESTAD – Capitan Glen Andrew, un yiu di tera naci na Aruba na 1976, a comparti un momento special cu su mayornan durante vuelo AA2217 di American Airlines, dia 3 di augustus. Pa prome biaha, Sr. Gifton Andrew y Sra. Myra Andrew a biaha como pasajero den un avion cu nan propio yiu tabata pilotando como capitan.

Andrew a gradua di Colegio Arubano na 1997 y despues a sigui estudio na Embry-Riddle Aeronautical University na Daytona Beach, Florida. Na aña 2000, el a completa su estudio den Aeronautical Science.

Su carera profesional a cuminsa na 2003 cu Republic Airways, un compania regional cu ta opera buelonan pa aerolineanan grandi manera American Airlines, Delta Air Lines y United Airlines. Despues di añanan di experiencia y progreso den aviacion, Andrew a bira capitan na American Airlines na 2021.

Aunke el a opera e ruta Miami-Aruba anteriormente, e vuelo di dia 3 di augustus tabatin un significado diferente. Su mayornan tabata abordo, rumbo Miami, pa reuni cu otro miembronan di famia y celebra e cumpleaño di 80 aña di su tata, dia 5 di augustus.

Segun famia y amigonan, Sr. Gifton Andrew tabatin e deseo pa hopi aña di un dia bula den un avion pilota pa su yiu. Cu e vuelo aki, e soño a bira realidad.

Famia Andrew a destaca cu e logro ta resultado di hopi aña di sacrificio, apoyo y dedicacion. Apesar di su carera internacional, Andrew ta conoci como un persona humilde cu no ta busca atencion pa su exito.

Su trayecto ta un ehempel di con educacion, disciplina y perseverancia por habri porta na nivel internacional. Al mesun tempo, e momento comparti cu su mayornan ta subraya e balor di famia y e importancia di no lubida e sacrificionan cu a haci un soño posibel.