Banconan na Aruba tin casi 250 miyon florin mas disponibel

ORANJESTAD – Banconan comercial na Aruba a registra un aumento di casi 250 miyon florin den nan exceso di liquidez durante e prome tres lunanan di 2026. Segun cifranan di Banco Central di Aruba (CBA), e total di placa disponibel cu banconan tin a subi te mas di 1,16 biyon florin.

E aumento no ta representa ganashi di banconan, sino placa cu a keda den e sistema financiero despues cu gobierno, entidadnan publico y e actividad turistico fuerte, a deposita mas fondo. E exceso di liquidez ta duna banconan mas espacio pa presta placa, aunke esaki no kier men cu haya prestamo lo bira mas facil.

Durante e prome trimester, e total di prestamonan a crece cu casi 80 miyon florin, y asina e cartera total di credito a pasa e 5 biyon florin. Sinembargo, e crecemento di prestamonan tabata hopi mas chikito cu e cantidad di placa cu a drenta den banconan.

Banco Central a confirma cu e porcentahe di reserva obligatorio ta keda na 12,5%, loke ta contribui na mantene stabilidad den e sistema financiero.

Ademas, reserva internacional di Aruba a subi cu mas di 363 miyon florin, alcanzando casi 5 biyon florin. Segun CBA, esaki ta suficiente pa cubri 8,4 luna di pago na exterior y sostene e balor di florin Arubiano.