Aeropuerto di Aruba ta fortalece fluho di pasahero cu tecnologia

ORANJESTAD – Aeropuerto Internacional Reina Beatrix ta sigui mehora e proseso di atende pasajeronan door di implementa tecnologia moderno y fortalece colaboracion cu diferente autoridadnan cu ta opera na aeropuerto. Esaki ta sali for di e mas reciente informe operacional.

Aunke diferente autoridadnan ta sigui enfrenta limitacion den personal y presupuesto pa overtime, uso di tecnologia manera E-gates, Global Entry, Mobile Passport Control (MPC) y Enhanced Passenger Processing (EPP) a contribui pa reduci tempu di espera y mehora e fluho di pasajeronan.

Segun e informe, colaboracion entre Aruba Airport Authority (AAA), Customs, Immigration Aruba, US Customs and Border Protection (CBP), DCAA y otro entidadnan a resulta den un proseso mas eficiente pa asigna flight slots y controla e cantidad di pasaheronan cu ta presenta na check-in pa buelonan rumbo na Estados Unidos.

Immigration Aruba, cu apoyo di Koninklijke Marechaussee (KMAR) y Warda Nos Costa, ta usa E-gates diariamente tanto pa salida como pa yegada. Ademas, e sistema di E-gates nobo, instala na 2025, ta operacional, mientras cu e programa Aruba Happy One Pass ainda ta pendiente di implementacion.

Customs tambe a sigui haci control completo di pasaheronan y, ora fila tabata bira demasiado grandi, a aplica metodonan alternativo pa mantene e fluho di viajero.

Mirando pa futuro, AAA ta preparando e introduccion di Airport Collaborative Decision Making (ACDM) durante 2026. E sistema lo mehora coordinacion entre tur partner di aeropuerto, facilita planificacion adelanta y comparticion di informacion importante. Como parti di e proyecto, tambe tin plan pa establece un Airport Operations Control Center (APOC) nobo, cu lo centralisa coordinacion operacional y uso di datonan pa mehora eficiencia y servicio na pasajeronan.