Aruba ta sigui ta un di e mihor destino pa evita alga di laman (sargassum)

ORANJESTAD – Mientras hopi beach na Florida y den Caribe ta enfrenta cantidad grandi di alga di laman (sargassum), Aruba ta sigui destaca como un di e mihor destinonan pa disfruta di beach limpi durante e temporada di solo. Esaki segun un articulo den Fodors Travel. 

Segun e articulo cu ta cita expertonan, sargassum ta un fenomeno natural di alga bruin cu ta move for di costa norte di Brasil pa Caribe y Florida door di corrientenan di lama. Ora e alga yega na costa den grandi cantidad, e por cubri playa, crea mal olor y afecta experiencia di bishitantenan.

Florida, Republica Dominicana, Puerto Rico, Barbados y parti di Jamaica ta entre e lugarnan cu actualmente ta registra hopi sargassum. Sinembargo, expertonan ta indica cu e situacion ta varia segun e banda di un isla, paso e beach na e banda cu ta proteha for di biento normalmente ta haya menos alga.

Aruba ta sigui wordo menciona como un destino favorable paso hopi di su beachnan, specialmente na e costa occidental, regularmente ta haya mucho menos impacto di sargassum. Esaki ta haci e isla un opcion atractivo pa turista cu ta busca laman limpi y un experiencia di playa mas agradable.

Expertonan tambe ta conseha biahero pa contacta hotelnan prome cu reserva nan estadia, paso condicionnan di biento y coriente por cambia lihe y influencia e cantidad di sargassum cu ta yega na beach.