WestJet ta reanuda buelonan despues cu welga a afecta Aruba pa un dia

ORANJESTAD – E welga di personal di cabina di WestJet, cu a causa cancelacion y retrasonan di buelo durante e fin di siman, a afecta  Aruba tambe pa un dia. Entretanto, e conflicto laboral a termina despues cu e compania a yega na un acuerdo provisional cu e sindicato, permitiendo cu operacionnan ta gradualmente bolbiendo na normalidad. Aruba tabata entre e destinonan den Caribe dialuna cu a sinti e efecto di e interrupcion, paso algun buelonan entre Canada y e isla a haya retraso of cancelacion. Esaki a crea incertidumbre pa algun turista cu tabata rumbo Aruba y pa bishitantenan cu tabata preparando pa bolbe Canada.

WestJet a confirma cu e acuerdo provisional pone fin na e welga y cu e compania ta trabaja pa reposiciona avionnan y tripulacionnan pa restablece su horario di buelo. Sin embargo, e aerolinea a advirti cu e recuperacion completo di operacionnan por tuma algun dia mas.

Pa Aruba, e noticia ta un alivio, paso Canada ta un mercado importante pa turismo di e isla. Cu e welga awo suspendi, e expectativa ta cu e conectividad aereo lo normalisa gradualmente y cu e impacto riba yegada di turista lo keda limita. WestJet ta bula 5 pa Aruba 5 dia pa siman, dialuna, diamars, diaranson, y diabierna y diasabra for di Toronto.