Seis hende deteni den investigacion di asesinato di Rayshon Kelly

ORANJESTAD – Autoridadnan a detene seis persona en total den conexion cu e asesinato di e hoben Rayshon Kelly, cu a perde su bida dia 22 di juli 2026 riba e parking na banda patras di Stadion Nadi Croes/Crismo Angela, na frontera di Macuarima cu Rooi Bosa.

Segun e investigacion, Rayshon, di apenas 16 aña, tabata riba un motorcycle hunto cu otro persona ora un auto cu tres ocupante a para y a los tiro riba nan. E hoben a ricibi varios impacto di bala y, apesar di cu paramediconan a transport'e cu urgencia pa hospital, e la fayece poco tempo despues.

Polis y Ministerio Publico ta sigui investiga diferente posibilidadnan pa determina e motibo di e atake. Un di e teorianan ta cu e caso por ta relaciona cu un encuentro pa bende un smartphone via Facebook Marketplace. Investigadornan tambe ta verifica si e sospechosonan tabatin un patronchi di invita hende pa mira mercancia y despues a roba nan.

Te cu awor pues, seis sospechoso a wordo detene, incluyendo dos persona cu tabata na punto di bai for di Aruba. Ministerio Publico ainda no a divulga mas informacion tocante e rol exacto di cada sospechoso, pasobra e investigacion ta continua.

Autoridadnan ta spera cu e proceso den Corte lo pone mas claridad riba loke exactamente a pasa y ken ta responsable pa e asesinato di Rayshon Kelly.