Gobierno lo cuminsa multa supermercado cu no respeta prijsnan maximo

ORANJESTAD – Gobierno di Aruba lo cuminsa cu handhaving oficial for di 15 di augustus contra supermercado y minimarketnan cu ta cobra mas cu e prijsnan maximo permiti pa productonan di e canasta basico. Traduci na papiamento crioyo, esaki kier men cu gobierno lo cuminsa actua y multa esnan cu no respeta e prijsnan maximo. Esaki a keda anuncia door di minister di Finansa, Asunto Economico y Sector Primario, Geoffrey Wever.

Segun e minister, Departamento di Asuntonan Economico, Comercio y Industria (DEACI) ta controla   alrededor di 1.300 producto den supermercado y minimarketnan diariamente. Te awe, comerciante cu no tabata cumpli tabata ricibi solamente un advertencia. Cu e cambio di ley, autoridadnan awor por impone multa administrativo si, despues di un periodo pa coregi e situacion, e comerciante no sigui e prijsnan establece.

Wever a bisa cu e medida no tin como meta castiga comerciante, sino garantisa cu tur negoshi ta sigui e mesun reglanan y cu consumidor ta paga prijsnan husto pa productonan esencial. Segun e minister, mayoria di supermercadonan ta cumpli caba, pero e handhaving nobo lo permiti gobierno actua contra e excepcionnan.