Plan di FIFA pa atrae inversionistanan ta causa critica mundial

ZURICH – FIFA ta evaluando un plan pa crea un compania aparte cu lo maneha e organizacion di Copa Mundial Masculino, Mundial Femenino y Mundial di Clubnan. Segun The Times, e compania nobo, cu por yama FIFA Forward Enterprise, lo keda bou control mayoritario di FIFA, pero entre 20% y 30% di accionnan por wordo bendi na inversionistanan privado. 

E proyecto lo por tin un balor inicial di US$20.000 miyon. Ademas, un otro 20% lo wordo reparti entre e 211 asociacionnan miembro di FIFA, cu por tene of bende nan participacion.

FIFA a confirma cu e idea ta wordo studia, pero a enfatisa cu ningun decision ainda a wordo tuma y cu e organisacion lo sigui mantene control total. Entretanto, UEFA y otro lidernan di futbol a critica  e propuesta, bisa cu e gobernansa di futbol no mester bira un producto comercial. Na Europa, algun asociacion ta considera accionnan fuerte, inclusive un posible boicot di futuro Mundial si e plan sigui dilanti.