Monumentenfonds ta bira propietario di Seroe Colorado Community Church

SAN NICOLAS – Stichting Monumentenfonds Aruba (SMFA) a bira e nobo propietario oficialmente di Seroe Colorado Community Church, despues cu a completa e proceso di traspaso cu Gobierno di Aruba.

E iglesia historico ta den mal estado pa hopi aña, y SMFA ta considera restauracion como e prioridad principal. E fundacion ya a ricibi apoyo di Archiosa Architects N.V., cu lo entrega e diseño di restauracion como un aporte na comunidad.

SMFA lo cuminsa cu un plan di cuater fase: reparacion urgente di e dak y problemanan structural, renobacion di e edificio di Sunday School pa crea espacio  pa actividad, mehora di e areanan pafo y, finalmente, restauracion completo di e iglesia.

E fundacion ta inicia e buskeda di fondo y ta haci un yamada na comunidad pa contribui cu donacionnan pa salba e monumento historico, cu tin un gran balor pa ex-trahadonan di Lago, nan famianan y pa patrimonio cultural di Aruba.