Iberostar ta lidera alianza pa reduci desperdicio organico na Aruba

EAGLE BEACH – Iberostar Aruba y varios socio local den sector di hospitalidad ta fortalece nan cooperacion pa reduci desperdicio organico y promove un economia circular na Aruba. E iniciativa ta forma parti di un Memorandum of Understanding firma na 2024 hunto cu miembro di Comite Ambiental di AHATA.

E proyecto ta enfoca riba separacion di desperdicio organico pa converti esaki den compost y cuminda pa galiña, enbes di manda e material pa dump. E compost resultante lo wordo uza pa landscaping, agricultura, hardinnan comunitario y proyectonan ambiental.

Como parti di e iniciativa, representantenan di diferente hotel a bishita un proyecto similar na Republica Dominicana pa haya conocemento practico riba maneho sostenibel di desperdicio organico.

Segun Iberostar, e colaboracion ta demuestra cu sector di turismo por hunga un papel importante den reduccion di desperdicio y proteccion di medio ambiente na Aruba.