Mas cu mitar di e hogarnan na Corsou no por paga nan debenan

WILLEMSTAD – Mas cu mitar di e hogarnan na Corsou ta bisa cu nan entrada no ta suficiente pa paga debenan y obligacionnan financiero. Esaki ta resulta di e prome resultadonan di e investigacion social Enkuesta Sosial 2025, publica door di Oficina Sentral di Estadisticanan (CBS). Asina e portal curacao.nu ta raporta. 

Segun e investigacion, 83.6% di e hogarnan tin acceso na internet na cas, mientras 77.4% di e poblacion ta uza social media.

E estudio tambe ta mustra cu e mayoria di e habitantenan a caba un estudio na nivel LBO of SBO. Mas cu mitar di e personanan entrevista a bishita un dokter di cas den e ultimo seis luna, y 36.1% di e poblacion di cinco aña of mas a participa den actividadnan deportivo durante e ultimo aña.

Riba tema di seguridad, 53.1% di e entrevistadonan a indica cu nan ta sinti nan mes hopi sigur ora nan ta cana nan so den nan bario durante anochi.

CBS ta indica cu e resultadonan aki ta solamente un prome vision general. Den e transcurso di e aña lo sigui publicando rapportnan separa cu analisis mas amplio riba temanan manera bienestar, medio, cohesion social, actividadnan cultural, victimisacion, vivienda y trabou.