AZV: Test di cancer di tripa ta disponible pa tur persona cu tin necesidad medico

ORANJESTAD – AZV, hunto cu Fundacion ABO, HAVA y Ministerio di Salubridad Publico y Cuido di Adulto Mayor, a aclara cu no ta berdad cu personanan cu tin mas di 75 aña no tin derecho pa haci un test di cancer di tripa (CORESA).

Segun AZV, tur asegurado, sin importa nan edad, por bishita nan dokter di cas ora nan tin kehonan of sintomanan. Si e dokter determina cu un test ta medicamente necesario, e por ordena e investigacion siguiendo e guia mediconan oficial. Si ta necesario, e pashent lo wordo referi pa un specialista.

AZV a splica cu e programa preventivo CORESA ta dirigi specificamente na personanan di 45 te 75 aña. E seleccion di e grupo aki ta basa riba investigacion cientifico y recomendacionnan internacional, cu ta mustra cu e beneficio di deteccion temprano ta mas grandi cu e posible riesgo.

Esaki, sinembargo, no kiermen cu personanan cu ta mas hoben cu 45 aña of mas grandi cu 75 aña no por haya cuido. Nan mester consulta nan dokter di cas, kende lo evalua si tin motibo medico pa haci e testnan correspondiente.

AZV a enfatisa cu e ta sigui traha hunto cu su partnernan den sector di salud pa mehora acceso na cuido medico y ta invita comunidad pa busca informacion correcto via Fundacion ABO, dokter di cas of directamente cu AZV.