Dia nacional di limpiesa, un otro acto publicitario of algo structural pa futuro?

Scirbi pa Tito Laclé

Den e mesun siman cu mi a publica e preocupacion pa cu e situacion di limpiesa - bogando pa cambio di mentalidad - gobierno di Aruba a anuncia un  plan nacional di limpiesa. E ta zona como coincidencia, pero e unico coincidencia ta cu e dos temanan a keda publica mesun siman. Ta logico cu gobierno tabatin esaki den tapara y cu nos no tabata na altura. Ami no. Y otro medionan posiblemente tampoco no. Awor, mi por ta contento cu e iniciativa aki, of cu e noticia aki, pero mi mester keda consecuente na e conclusion di mi analysis. 

CAMPAÑA DI UN SOLO DIA

E accion di limpiesa benidero ta algo nacional, pero pa UN dia. Osea cu gobierno ta organisando henter un mobilisacion nacional  pero pa UN dia. Cu mi ta corda, mi no a lesa cu ta e comienso di loke mester bira algo mas structural. Y cu un comunicado di prensa cu a sali apenas awe ainda, di e mesun partido cu ta organisa e evento, den e caso aki parlamentario di AVP, Stephany Sevinger, esaki a keda confirma. E ta pidi pa no solamente haci esaki riba UN dia, pero pa bin cu algo mas structural. Esey ta bisa mi cu NO tin un plan di largo plazo loke ta necesario a un impacto structural. Por lo menos un “tal plan” no ta conoci, ni pa e parlamentario di e partido berde mes. 

Mobilisa henter un isla pa un solo dia pa haci limpiesa, ta ‘leuk’, y ta ‘algo’, pero e no ta yuda e causa. Pakico? Y no bin bisa mi awor cu mi ta negative. No, mi ta solamente realista. Y laga mi splica bo y corda bo pakico! Sushi, ta algo cu ta acumula DIARIAMENTE. Den otro palabra: tur dia ta bin mas sushi acerca. P’esey, si bo organisa UN dia nacional di limpiesa, e no ta resolve e problema, pasobra e siguiente siman, mi por garantisa bo cu e lugarnan lo cuminsa acumula cu sushi atrobe. Tur hende por mira esaki sosode bes tras bes: sea ta unda Bureau City Inspector a haci limpi of hasta unda Mike Eman mes cu su team a haci limpi. Dus, esaki ta basicamente bira un tipo di “bucket-list effect”. Core haci algo den pura pa motibo di presion di tempo, pa djis bisa cu a haci tal. Y mientras cu tin  un cantidad di otro cos cu tin mas prioridad.  Si. Pero berdad, manera cu mi mes a pone, e ta algo HOPI necesario si!. 

 ALGO MAS GRANDI

Ora bo haci algo, bo tin cu hacie bon. Atrobe, mi no ta bisando cu esaki ta malo, sino leuk. Pero haci algo, hacie bon. Pakico no anuncia un dia NACIONAL di limpiesa, como INICIO di algo mucho mas grandi, y ANUNCIA esaki tambe mesora. Por lo menos, e ora e personanan cu BAY yuda e dia ey, SA cu nan esfuerso no ta bay ta envano. Pasobra mi por imagina cu un hende ta pensa cu si e bay participa, cu ta trabou por nada pasobra su manece (den forma di bisa) tin sushi atrobe tur caminda, mescos cu bo bari ta yena atrobe, ora cu a hacie bashi, pasobra asina cos ta funciona. Sushi ta sigui wordo genera tur dia! Si bo combina esey cu un malcustumber di djis tira esey den mondi, pronto e mesun luganan ta acumula sushi atrobe.

 OTRO ACTO DI PUBLICIDAD

Ken por ta contra un accion di limpiesa? E un bon evento, pa uni e comunidad, y conscientisa comunidad cu hunto nos por haci un diferencia. Pero mi tin miedo cu e motivacion principal su tras, ta cu e ta y lo bira un bon momento pa saca cantidad di potret y relato di prensa den tur forma, cu cada instancia possible, pa despues usa esaki como material promocional, sea pa e partido of pa campañanan futuro. Awor caba, ta sacando varios articulo di cada biaha cu un of otro instancia ‘nobo’ dicidi cu e tambe ta participa na e un evento aki. Diabierna tin henter un conferencia di prensa djis pa organisa cu un otro tambe ta participa. Great, pero mester un conferencia pa esaki? Cada un ta bira un noticia. Asina e ta mustra mas cu e mester sirbi e proposito di laga un “legado” atras, mirando cu tempo ta cabando pa e epoca activo den politica di Mike Eman. Pero kico tin di malo den esaki, hasta si esaki ta berdad cu ta djis trata di “legacy effect”?

LAGA LEGADO ATRAS

Pa laga un legado atras como politico ariba su mes no ta algo negativo. Pero e por cambia e focus di un minister president y su gabinete si den forma drastico. Enbes di ocupa nan mes cu “kico ta nos responsabilidad”, nan por presta mas atencion na e pregunta “con mi por crea un imagen publico positivo”. Kisas e diferencia no ta mustra grandi, pero e ultimo focus por guia na decisionnan cu ta mas dirigi ariba visibilidad enbes di sabiduria. E sentido di urgencia falso tambe por guia na decisionnan ad hoc sin tene suficiente cuenta cu e efectonan negativo. Vooral pa proyectonan asina, mi tin miedo cu lo bin, si permiti cu henter pueblo ta djis acepta e accionnan aki cu por ta dirigi solamente na laga un legado atras.

Enfin, mi punto ta cu no mester laga esaki bira djis un otro moment opname, un oportunidad pa saca probecho publicitario, sino algo mas profundo, mas solido cu un plan real cu ta bay sigui  structuralmente, pa di berdad, nos isla bira un isla mas limpi. 

Den mi editorial anterior riba e tema aki, a mustra varios cos cu por y mester tuma lugar, pa REALMENTE logra e meta di un isla mas limpi, envez di djis algo momentario. C’est la vie.