Declaracion di impuesto 2025 lo bira completamente digital

ORANJESTAD – Departamento di Impuesto a anuncia cu pa aña fiscal 2025 e formulario di declaracion di inkomstenbelasting lo wordo entrega completamente den formato digital via e portal BO impuesto (BOi). Esaki ta nifica cu e conocido "envelop oranje" cu tabata yega den postbus di contribuyentenan lo no wordo manda mas.

E formulario digital ta planea pa bira disponibel durante luna di november 2026, aunke e fecha oficial ainda no a wordo confirma. Ora e fecha keda defini, Departamento di Impuesto lo informa comunidad oficialmente.

Contribuyentenan lo yena nan declaracion online, subi tur documento necesario y entrega e formulario directamente den e portal. Despues di entrega, e sistema lo registra e fecha di entregamento automaticamente.

Pa por usa e sistema, cada contribuyente mester tin su propio account di BOi. Esaki ta conta tambe pa parehanan casa, cu cada un mester registra individualmente. Persona cu ta desea cu un accountant of otro representante yena nan declaracion, mester autorisa esaki previamente via e portal BOi.

Departamento di Impuesto ta aconseha contribuyentenan pa cuminsa reuni y digitalisa awor caba tur documento necesario, manera declaracion di salario, pensioen, interes bancario, donacionnan, gastonan di educacion y otro documentonan relevante. Empresarionan cu un empresa propio tambe mester prepara nan relato anual di 2025.