La Quinta ta fortalece colaboracion cu productor local

EAGLE BEACH – La Quinta Beach Resort a anuncia un colaboracion cu e empresa local Arubalife Organics como parti di su esfuersonan pa promove sostenibilidad y fortalece economia local.

E colaboracion a wordo presenta durante un encuentro cu huespednan, partnernan y miembronan di comunidad, caminda fundadora di Arubalife Organics, Julienne Heronimo, a comparti su experiencia como comerciante y e importancia di traha cu productonan natural produci na Aruba.

Segun e resort, e iniciativa ta enfoca riba crea mas oportunidad pa negoshinan local y duna bishitantenan un experiencia cu ta conecta nan mas cu e comunidad Arubiano y cu e productonan cu ta wordo fabrica na e isla.

Representantenan di La Quinta a indica cu nan ta sigui kere cu colaboracion entre sector turistico y comerciantenan local ta un manera importante pa promove un turismo mas sostenibel y pa contribui na desaroyo economico di Aruba.