CTO: Aruba ta sigui crece como destino turistico

ORANJESTAD – Aruba a sigui registra un crecemento den turismo durante e prome tres luna di 2026. Entre januari y maart, e isla a ricibi un total di 427.343 bishitante, un aumento di 8,9% compara cu e mesun periodo na 2025, segun cifranan publica door di Caribbean Tourism Organization (CTO).

Cu e resultado aki, Aruba ta posiciona su mes como un di e destinacionnan turistico cu mihor rendimento den Caribe durante e prome kwartaal di e aña. E crecemento ta sigui e tendencia positivo cu e isla a conoce durante e ultimo añanan.

E aumento den cantidad di bishitantenan ta coincidi cu un di e periodonan di mas inversion den sector hotelero, manera cu e portal aki a raporta un dia anterior. 

Tradicionalmente, e prome kwartaal ta e temporada mas ocupa pa Aruba, ora hopi turista for di Merca y Europa ta busca un destino cu solo y clima calor pa scapa di winter.

Segun CTO, e crecemento di casi 9% ta confirma cu demanda pa Aruba ta sigui fuerte. Un di e bentahanan principal di e isla ta cu Aruba ta situa pafor di e area di huracannan den Atlantico, loke ta haci cu e ta un destino atractivo durante henter aña.

Ademas di su clima constante, beachnan di blanco y amplio variedad di hotelnan y resortnan, Aruba tambe ta beneficia di un gran cantidad di bishitante cu ta bolbe anualmente, consolidando su posicion como un di e destinacionnan di vakantie mas confiabel den Caribe.