Wever-Croes: Parlamento mester sa kiko ta cambia den acuerdo cu Hulanda

ORANJESTAD – Lider di fraccion di MEP den Parlamento y ex Prome Minister, Evelyn Wever-Croes, diamars a pidi Gobierno pa brinda Parlamento mas claridad tocante e negociacionnan cu Hulanda riba e acuerdo entre Aruba y Reino, specificamente e ley di reino HOFA. Durante e reunion publico di Parlamento e siman aki, Wever-Croes a expresa preocupacion paso, segun e, e parlamentario ainda mester depende riba loke ta publica den prensa pa haya informacion tocante un tema di tanto importancia nacional.

BISHITA DI VD BURG 

Wever-Croes a haci referencia na bishita di Secretario di Estado Eric van der Burg na Aruba y na declaracionnan cu el a haci recientemente na Hulanda. Segun diferente informe di prensa, Van der Burg a indica cu a haya autorizacion pa renegocia of modifica e acuerdo cu Aruba. Sinembargo, otro informe a menciona cu solamente algun punto especifico lo wordo adapta. Segun Wever-Croes, e diferencia den e informacion ta haci cu Parlamento mester haya un splicacion oficial di Gobierno. "Pueblo y Parlamento tin derecho di sa exactamente kiko ta wordo negocia na nomber di Aruba," e lider di MEP a indica.

PREGUNTA RIBA AUTONOMIA

Wever-Croes a puntra tambe kiko exactamente a wordo discuti cu Secretario di Estado tocante e observacionnan di Raad van Advies y Raad van State, y pakico Parlamento ainda no a ricibi un actualisacion completo di e progreso di e negociacionnan.

POSICION FINANCIERO FUERTE DI ARUBA

Durante su intervencion, e ex Prome Minister a reconoce cu e posicion financiero di Aruba actualmente ta fuerte. El a indica cu e fundacion di e recuperacion financiero a wordo pone durante su gobierno, mientras cu e actual gabinete a sigui cu e maneho. Segun Wever-Croes, Aruba ta e unico pais den Reino cu a registra surplus durante cuatro aña consecutivo y a logra baha significativamente su deuda nacional.

"PAKICO HULANDA MESTER TIN E ULTIMO PALABRA?"

Basa riba e resultado financiero aki, Wever-Croes a cuestiona pakico Hulanda mester sigui tin e decision final riba asuntonan financiero. "Si Aruba a demostra cu nos por maneha nos propio finansas responsablemente, kico ta e motibo pa entrega e ultimo palabra na Hulanda?" el a puntra. E lider di MEP a bisa cu e ta comprende deseo di Gobierno pa logra condicionnan financiero mas favorable, manera un interes mas abou, pero a adverti cu semper mester evalua kiko Aruba ta cede a cambio. Finalmente, Wever-Croes a pidi Gobierno pa informa Parlamento di manera completo tocante e negociacionnan cu Reino. El a anuncia cu lo bolbe riba e tema durante e siguiente reunionnan di Parlamento.