ATSA ta enfoca riba futuro di sector timeshare

ORANJESTAD – Aruba Timeshare Association (ATSA) a reuni recientemente cu su miembronan pa analiza e desaroyonan mas reciente den e industria di vacation ownership, manera tambe diferente tema nacional cu por afecta e futuro di e sector turistico. E encuentro a tuma lugar na La Cabana Beach Resort & Casino, unda representantenan di diferente resort a comparti informacion tocante inversionnan, sostenibilidad, maneho gubernamental y e experiencia di bishitantenan.

DIALOGO CU GOBIERNO

Un di e puntonan principal di discusion tabata e iniciativa di Dialogo Social cu Gobierno a lansa. Miembronan di ATSA ta di opinion cu stakeholdernan cu ta directamente envolvi den e industria mester haya un papel mas activo den e dialogo. Ademas di e propuesta pa aumenta salario minimo, nan ta kere cu tambe mester papia di cambionan den ley laboral cu por afecta e sector.

MAS ENFASIS RIBA EDUCACION Y SOSTENIBILIDAD

ATSA a confirma cu lo sigui brindando oportunidad na studiantenan di hospitalidad pa conoce di cerca con e industria di vacation ownership ta funciona. E programa educativo ta enfoca riba mostra hobenan e diferente oportunidadnan di trabou y desaroyo profesional den e sector. Paralelamente, e asociacion ta trahando riba un Codigo di Etica nobo cu lo inclui guia pa operacionnan mas sostenibel y responsable. Universidad di Aruba tambe por participa den e proceso pa yuda compara e iniciativa cu miho practicanan internacional.

PREPARACION PA TEMPORADA DI HURACAN

Cu e temporada di huracan oficialmente a cuminsa, ATSA ta prepara pa nombra un representante cu lo forma parti di e Team Nacional di Crisis. E persona aki lo coordina e contacto entre e resortnan miembro y e autoridadnan durante eventual situacion di emergencia.

ATSA TA PIDI ACCION RIBA DIFERENTE PRIORIDAD

Durante e reunion tambe a wordo analiza e Tourism Calibration Framework, presenta recientemente door di Ministerio di Turismo. Miembronan ta satisfecho cu nan por contribui sugerencianan, pero ta spera cu e documento finalmente lo converti den accion concreto. Entre e prioridadnan menciona ta actualisa e Politica di Playa, modernisa e transporte pa turista, introduci un aplicacion oficial pa taxi, regula e alquiler vacacional, evalua e impacto di cruceronan riba e experiencia turistico y sigui cu plannan pa crea un playa nobo den Bushiri.

RESORTNAN TA SIGUI INVERTI

Diferente resort miembro tambe a presenta actualisacionnan tocante inversionnan reciente. La Cabana Beach Resort & Casino recientemente a habri su deck nobo na piscina. Playa Linda Beach Resort a haya luz berde pa construccion di un gym y spa nobo, mientras Amsterdam Manor Beach Resort a termina un renovacion completo y ta construyendo facilidadnan nobo pa personal.

Paradise Beach Villas ta prepara un food truck nobo y renovacion di su restaurante banda di piscina, mientras Costa Linda Beach Resort ta sigui inverti den mehoracionnan pa aumenta e calidad di servicio na su huespednan.