DBB cu conseho di biahe: Verifica bo destinacion prome

ORANJESTAD – Cu e temporada di vakantie escolar dilanti porta, Departamento di Relacionnan Exterior ta recorda tur persona cu ta planiando un biahe pa verifica prome e conseho oficial di biahe pa nan destinacion. Un bon preparacion por evita problema y contribui pa un biahe mas sigur.

E departamento ta recomenda pa consulta e conseho di biahe publica door di Ministerio di Asuntonan Exterior di Reino, particularmente ora bo ta planiando biaha pa un pais of region cu tin un codigo oranje of codigo cora.

Un codigo oranje ta nifica cu solamente biahenan esencial ta recomenda. Esaki por ta, por ehempel, pa motibonan di trabou urgente of un situacion familiar serio. E gobierno ta considera e areanan aki como insegur pa biahenan regular.

Un codigo cora, pa otro banda, ta un aviso claro pa no biaha bou di ningun circunstancia. E situacion di seguridad den e destinacionnan aki ta considera demasiado peligroso.

Departamento di Relacionnan Exterior tambe ta pone enfasis riba un punto importante: si un persona biaha voluntariamente pa un pais cu tin codigo oranje of cora y despues haya problema, e representacionnan hulandes no semper lo por brinda e asistencia cu normalmente por spera.

Pesey, tur biahero ta wordo encurasha pa consulta e website oficial Nederland Wereldwijd prome cu nan sali. Riba e pagina aki por haya e informacion mas actual tocante seguridad, rekisitonan di entrada, visa, leynan local, diferencianan cultural y e datonan di contacto di embahadanan y consuladonan di Reino.