Corte: Gobierno por actua contra e-steps, pero sin multa ainda

ORANJESTAD – Gobierno di Aruba y dos empresa cu ta huur e-steps, e-bikes y e-scooters, Evikes y Friendly Green Bikes, a para awe dilanti di hues den un caso cu por determina con e tipo di vehiculonan aki lo por wordo maneha den futuro. Na final di e audiencia, e hues no a duna un fayo final, pero si un decision temporal. Gobierno por actua contra e companianan pero mes momento ta pidi nan pa no haci’e. 

E CASO

Manera ta conoci, tur cos a cuminsa dia 27 di mei  ultimo ora Minister di Husticia Arthur Dowers a manda un aviso separa na e dos empresa cu nan tabata huur e vehiculonan sin e permiso obligatorio di Motorvoertuigen- en Vaartuigen (MFV). E minister a laga nan sa cu, si nan no stop cu e huur ilegal, Gobierno lo tuma accion.

DWANGSOM

Dia 29 di juni, Gobierno a sigui cu un last onder dwangsom. Esaki ta nifica cu, despues di 15 dia, Gobierno por cobra Afl. 500 pa cada e-step, e-bike of e-scooter cu ta sigui wordo huur sin permiso. Evikes y Friendly Green Bikes a pidi e hues pa para e medida temporalmente pa mas cu seis luna. Nan a bisa cu, si Gobierno cuminsa cobra e multanan, nan empresa lo haya tanto daño financiero cu nan no lo por paga nan gastonan mensual. Gobierno, sinembargo, a bisa cu e mes empresanan anteriormente a entrega cifranan tocante nan entrada y gastonan. Segun Gobierno, e cifranan ta mustra cu nan tin suficiente entrada pa paga nan gastonan durante varios luna mientras e caso legal ta sigui. Durante e audiencia, e hues a bisa cu, te na awe, e empresanan no a logra mustra cu nan lo cay den problema financiero serio si nan mester cumpli cu e medida. Si e hues tabata duna un fayo awe mes, probablemente e peticion lo a wordo wordo rechasa.

MAS TEMPO

Pero e hues a prefera no tuma un decision final ainda. El a duna e dos empresanan 14 dia mas pa entrega prueba adicional cu por mustra cu e medida di Gobierno lo pone nan den dificultad financiero. Despues Gobierno lo por contesta riba e documentonan, y solamente despues e hues lo tuma su decision final. Mientrastanto, e hues a bisa cu legalmente el no por stop Gobierno di pone e medida na vigor. Sinembargo, el a pidi Gobierno pa, den un "gentlemen's agreement", no aplica e multa te ora e decision final wordo publica.