Corte a condena homber na 12 luna di prison pa estafa 12 persona

ORANJESTAD – Hues a condena un homber identifica como A.K.M. na un castigo di 12 luna di prison, di cual seis luna ta condicional, pa estafa un total di 12 persona durante e periodo di augustus 2025 te januari 2026. Ademas, e homber lo mester sigui tratamiento y supervision di Reclasering durante un periodo di prueba di tres aña.

DEBE BOU PRETEXTO FALSO

Segun Ministerio Publico, A.K.M. a haya diferente persona pa entrega placa of haci debe bou falso pretexto. El a presenta su mes como persona cu tabata huur apartamento, bende auto, por regla trabou of cu tabata tin contacto cu un notario. Segun e acusacion, 12 persona a bira victima di e estafanan. A.K.M. no a presenta na corte pa e audiencia final y a prefera keda den KIA. Su abogado si a represent’ee durante e proceso.

Durante e caso, Fiscal a pidi un condena di 12 luna di prison, di cual seis luna ta condicional, señalando cu e sospechoso ya anteriormente a wordo condena pa un caso similar. Fiscal tambe a tene cuenta cu un informe psicologico cu ta mustra cu A.K.M. tin problema mental y mester tratamento, pero cu esey no a evita cu el sigui estafa hende.

Den su sentencia, Hues a declara A.K.M. culpabel di estafa y a confirma e castigo pidi door di Ministerio Publico. Hues a tene cuenta cu e informe psicologico, cu ta indica cu e acusado no tabata completamente responsabel pa su actonan, pero tambe cu e ya anteriormente a wordo condena pa hecho similar.

Di e 12 reclamacionnan di daño presenta door di e victimanan, 10 a wordo acepta total of parcialmente. Dos reclamacion no a wordo acepta paso Corte no a haya suficiente prueba pa e acusacionnan especifico. Ademas, Hues a ordena A.K.M. pa paga compensacion na e victimanan. Si e no cumpli cu e obligacionnan financiero, e por haya un castigo adicional di prison.