Actor neozelandes Sam Neill a fayece na edad di 78 aña

ORANJESTAD – Actor neozelandes Sam Neill, conoci mundialmente pa su papel como paleontologo Dr. Alan Grant den e pelicula Jurassic Park, a fayece na edad di 78 aña. E noticia a wordo confirma atraves di un publicacion riba su pagina oficial di Instagram.

Segun e comunicado, Neill a fayece inesperadamente, rodea pa su famia. Ainda no a divulga e motibo di su fayecimento. Na aña 2023, e actor a anuncia cu e tabata lucha contra cancer, pero despues a wordo declara liber di e malesa.

"Sam tabata rodea pa su famia y a fayece cu e dignidad cu semper a caracteriza su bida," e comunicado ta bisa. Su famia a pidi privacidad pa por procesa e enorme perdida.

Periodista di entretenimiento neozelandes Kate Rodger, kende tabata conose Neill personalmente, a declara cu e actor a keda activo te na e ultimo dianan di su bida.

Neill a bira un artista internacional den 1993 cu su interpretacion di Dr. Alan Grant den Jurassic Park. Den e pelicula, su personahe ta bishita un parke tematico yen di dinosaurio clona riba un isla cerca di Costa Rica. El a bolbe interpreta e mesun papel den Jurassic Park III (2001) y Jurassic World Dominion (2022).

Ademas di Jurassic Park, Sam Neill tambe a participa den hopi otro produccionnan exitoso, incluyendo e popular serie di television Peaky Blinders, consolidando su reputacion como un di e actornan mas respeta di su generacion.