Van der Burg: “No tin reunion cu oposicion programa durante mi bishita na Aruba”

DEN HAAG – Durante un conferencia di prensa diabierna mainta, Secretario di Estado Hulandes pa Relacionnan den Reino, Eric van der Burg, a confirma na Tito Laclé di Noticiacla cu durante su bishita oficial na Aruba otro siman, no tin reunion programa cu partidonan di oposicion pa papia riba autonomia of e rol di Hulanda den Reino. Pregunta di Noticiacla tabata basa riba e reaccionnan fuerte cu a sigui despues di un entrevista anterior den cual Van der Burg a expresa su punto di bista tocante autonomia. Diferente partidonan di oposicion, specialmente MEP, a critica e declaracionnan ey.

HOPI CONMOCION 

Van der Burg a reconoce cu e entrevista, cu el a duna for di Den Haag, a crea hopi discusion. “Mi a tuma nota cu e entrevista a causa bastante conmocion, principalmente cerca un partido importante di oposicion. Mi a mira e reaccionnan cu a sigui.” Segun e Secretario di Estado, desde e momento ey e no tabatin mas contacto cu lider di MEP, Evelyn Wever-Croes. “No, desde e momento ey mi no a tin mas contacto cu señora Wever-Croes. Siman aki mi lo reuni cu Prome Minister, pero ningun representante di MEP ta inclui den mi programa.”

REUNION IPKO

El a aclara cu durante e reunion di IPKO na Hulanda tabatin parlamentario di tur cuatro paisnan di Reino presente, incluyendo representantenan di MEP, pero e reunion tabata cera y autonomia no a wordo discuti apart.

NO TA SORPRENDI 

Pregunta tambe tabata si e tabata sorprendi cu e reaccionnan riba su declaracionnan. Van der Burg a bisa cu no. “Mi no ta di acuerdo cu tur e declaracionnan cu a wordo haci. Personalmente mi lo a uza otro estilo, y mi ta pensa cu algun palabra grandi a wordo uza. Pero no, mi no tabata sorprendi. Mi sa cu MEP y señora Wever-Croes no ta partidario di HOFA y nan ta busca apoyo pa nan posicion den Parlamento di Aruba. Nan tin tur derecho pa haci esey.”

Van der Burg a conclui cu, apesar cu no tin reunion oficial cu oposicion programa, si durante su bishita el topa representantenan politico, naturalmente por tin un intercambio di palabra. NOTA: Potret di archivo di Noticiacla.