Pieters: Gobierno mester enfoca mas riba prevencion di adiccion

ORANJESTAD – Parlamentario Eduard Pieters (PPA) ta pidi un maneho nacional mas fuerte pa combati adiccion, poniendo enfasis riba prevencion en vez di solamente reacciona despues cu e problema ya a bira serio.

Durante e debate riba adiccion y salud mental, Pieters a bisa cu adiccion no ta solamente un problema individual, sino un reto nacional cu ta afecta salud publico, siguridad y bienestar di hopi famia.

Segun e parlamentario, gobierno ta laga polis, fundacionnan y profesionalnan carga cu gran parti di e problema, mientras cu falta un plan integral lidera pa Ministerio di Salud. E ta boga pa mas coordinacion entre diferente ministerionan y inversion den prevencion, tratamiento, rehabilitacion y reintegracion.

Pieters a conclui cu un gobierno fuerte mester evita cu mas ciudadano bira adicto, en vez di enfoca solamente riba e consecuencianan una biaha cu e problema ya a desaroya.