Van der Burg: “Mi kier pa HOFA wordo aproba mas lihe cu ta posible”

DEN HAAG – Secretario di Estado Hulandes pa Asuntonan di Reino, Eric van der Burg, a enfatisa cu su prioridad no ta kende lo caba e negociacionnan riba HOFA (refiriendo na e prome minister actual di Aruba of esun ‘nobo’ di otro aña:red) , sino cu e proceso mester wordo completa y aproba mas pronto cu ta posible. El a haci e declaracion aki durante un entrevista cu Tito Lacle di Noticiacla durante un conferencia di prensadiabierna mainta despues di Rijks Minister Raad.

E LEY LOCAL Y DI REINO MESTER KEDA APROBA 

Lacle a puntra si e declaracion anterior di Van der Burg ora cu a haya e reaccion di e anuncio di retiro ‘abrupto’ di Eman, den cual el a bisa cu ta importante cu HOFA wordo caba prome cu Prome Minister Mike Eman laga su cargo, por wordo interpreta como un preferencia pa termina e negociacionnan cu Eman y no cu su sucesor.

Van der Burg a contesta cu su interes principal ta, cu tanto e ley nacional como e Ley di Reino wordo aproba pa por duna claridad si HOFA lo sigui dilanti. “Ta na Parlamento di Aruba pa dicidi si e ley nacional lo wordo aproba of no. Ami, na mi banda, ainda mester logra aprobacion den Tweede Kamer y Eerste Kamer.”

HOFA TA IMPORTANTE 

Segun e Secretario di Estado, HOFA ta importante pasobra e ta fortalece cooperacion den Reino y amplia oportunidadnan pa Aruba.

“Esaki no ta tanto relaciona cu señor Eman personalmente. Mi kier simplemente, cu e proceso avansa mas lihe cu ta posible.”

El a indica cu durante e proximo seis luna e lo sigui traha cu Mike Eman, pasobra e conoce e dossier bon y ta tratando di logra apoyo den su coalicion.

EMAN MESTER KEDA CLA CU HOFA PROME CU E RETIRA?

Ora Lacle a puntra si el a pidi Eman pa caba e proceso prome cu laga su puesto, Van der Burg a contesta cu tur biaha cu nan reuni, HOFA ta un tema importante di conversacion.

Sinembargo, el a enfatisa cu finalmente ta responsabilidad di Gabinete y Parlamento di Aruba pa logra un mayoria pa e ley nacional.

“Mi mester pa e ley nacional wordo aproba prome. Solamente despues, si e Ley di Reino tambe pasa den Tweede Kamer y Eerste Kamer, mi por firma e ley y hacie drenta na vigor.”

Van der Burg a conclui cu ta den interes di tur partido involucra pa completa e proceso lo mas pronto cu ta posible.

EMAN TA POSITIVO TOCANTE HOFA

Riba un ultimo pregunta di Noticiacla, el (vd Burg:red)  a confirma cu, segun su opinion, Prome Minister Mike Eman y su gabinete ta positivo tanto tocante e ley nacional como tocante HOFA.