Croes( ATA) : Aruba no por sigui midi exito turistico solamente cu mas bishitante

ORANJESTAD – Aruba Tourism Authority (ATA) ta reconoce cu e modelo tradicional di midi exito turistico solamente a base di mas bishitante, mas kamber y mas capacidad ya no ta suficiente. Durante un presentacion pa prensa dialuna mainta, CEO di ATA Ronella Croes a enfatisa cu Aruba mester cambia su enfoke di crecemento continuo pa un modelo caminda desaroyo turistico ta wordo guia y limita pa proteha e isla pa futuro generacion.

Durante añanan, exito turistico a wordo midi principalmente cu volumen: cuanto mas bishitante ta yega via avion of crucero, cuanto mas kamber tin disponibel y cuanto mas capacidad e destino por absorbe.

Segun Croes, e cifranan aki ainda ta importante, pero nan no por keda e indicador principal di exito.

ATA ta papia desde despues di pandemia di e necesidad pa limita crecemento di volumen. E reto, segun Croes, no ta simplemente bisa cu Aruba kier menos turismo, sino determina con pa controla crecimiento mientras demanda pa destino ta keda fuerte.

“Nos ta posiblemente victima di nos mesun exito,” tabata un di e mensahenan central di e presentacion.

Aruba ta enfrenta un “reto di luho”: demanda internacional pa e isla ta sigui fuerte, mientras aumento di capacidad di hospedaje, short-term rentals y mas accesibilidad aereo por sigui aumenta presion riba e destino.

Pa limita e influx, Croes a indica cu finalmente Aruba mester mira tambe cuanto persona ta drenta via su dos portanan principal: aeropuerto y waf. ATA ta den dialogo cu Aruba Airport Authority, Aruba Ports Authority y Gobierno tocante e tema.

E cambio den filosofia ta significativo. ATA no ta papia mas di crecemento como meta principal, pero di guia e desaroyo turistico di manera cu e producto Aruba, naturaleza, infrastructura y comunidad por sigui sostene e industria.

Esey ta significa cu exito turistico no mester wordo midi solamente cu “cuanto hende a yega”, pero tambe cu cuanto valor turismo ta crea sin deteriora e isla cu ta sostene e industria.