Van der Burg kier papia cu Gobierno di Boneiru riba crisis politico

DEN HAAG – Secretario di Estado Eric van der Burg, encarga cu Relacionnan den Reino, lo reuni dialuna cu Bestuurscollege di Boneiro pa discuti loke ministerio a describi como e reciente desaroyonan administrativo y politico riba e isla. Asina e portal dossierkoninkrijksrelaties ta raporta. 

E reunion lo tuma lugar riba e prome dia di su bishita oficial na e islanan ABC. E encuentro ta bin despues cu e coalicion nobo na Boneiro a cay den un crisis apenas tres luna despues di tuma posesion.

E partido UPB, cu tin e mayoria den Bestuurscollege, inesperadamente a retira diputado Statia di MPB for di su cargo. Aunque UPB tabatin un candidato nobo cla pa remplasa dje, e otro partidonan di coalicion a evita cu e nombramento sigui dilanti.

Desde e momento ey, partidonan ta sigui negocia tocante e futuro di e coalicion. Un intento di mediacion pa gezaghebber John Soliano no a resulta, mientras cu e relacionnan politico entre e partidonan a sigui deteriora. Lider di UPB, Elton Craane, incluso a anuncia cu lo presenta un denuncia pa difamacion contra lider di MPB.

E ministerio no a revela kiko exactamente lo ta e tema central di e reunion cu Secretario di Estado Van der Burg y e miembronan cu ainda ta forma parti di Bestuurscollege.