Luydens: Problema cu inschrijving na Censo ta cu demanda a supera capacidad

ORANJESTAD – Directora di Censo Aruba, Sharin Luydens, a confirma cu e departamento ta enfrentando un crecemento significativo den demanda di su servicionan, loke a resulta den un aumento di e tempo di espera pa cita y entrega di diferente documentonan. Segun Luydens, e crecemento di poblacion y e cantidad di personanan cu ta solicita servicionan di Censo a aumenta fuertemente den e ultimo añanan. E cantidad di cita pa diferente tramite, manera inscripcion, paspoort, rijbewijs y otro documentonan, a supera e capacidad actual di e departamento.

PROBLEMA DEN REINO COMPLETO

El a indica cu e problema no ta limita na Aruba. Den henter Reino Hulandes tambe tin tempu di espera mas largo pa cita pa paspoort y otro servicionan similar. Luydens a revela cu Minister Dowers a haya conocemento di e situacion na principio di 2026 y a duna luz berde pa amplia e personal di Censo y pone varios proyecto den marcha pa reduci e atraso y aumenta e capacidad di e departamento.

COMPORTACION DI CLIENTE 

Segun e directora, un otro factor cu ta afecta e servicio ta e comportacion di algun cliente. Hopi cita no ta wordo utiliza pasobra e personanan no ta presenta nan mes ni cancela e cita. Na 2024 tabatin mas cu 2.000 "no-show", na 2025 e cifra a subi pa mas cu 4.000, aunke e porcentahe a baha pa alrededor di 20% debi na e aumento di e cantidad total di cita.

FALTA DI DOCUMENTACION 

Luydens a enfatisa tambe cu hopi persona ta yega na Censo sin e documentonan obligatorio, manera acta di nacimiento apostillá, acta di casamento original (ora ta aplicabel) of un paspoort valido. Esaki ta provoca retraso adicional den e proseso.

RECLUTA PERSONAL TA TUMA TEMPO

Finalmente, e directora a splica cu recluta personal pa Censo no ta facil, pasobra e departamento ta exigi empleadonan cu integridad, responsabilidad y compromiso cu servicio publico.